ЧАҢЧЫЛДАР ЛАГЕРИ «СОРУЛГА»

  • просмотры: 51 |
  • 8 | Июль |2019

Тыва Республиканың культура яамызының «Өгбелерниң өнчүзү XXI чүс чылдың агымында (чаңчылдар болгаш амгы үе)» деп аттыг төлевилелин ажылдап чорудары-биле Тыва үндезин культура төвү республиканың «Улусчу ужур-чаңчылдар клубтарының» ажылдакчыларынга май айда өөредиглиг семинарны эрттирген.

Ук семинарның кол сорулгаларының бирээзи – суур бүрүзүнде «Улусчу ужур-чаңчылдар клубтарынга» тыва үндезин культурага хамаарышкан бөлгүмнер ажыдар болгаш бөлгүмнерниң ажылынга методиктиг сүмелерни / программаларны шын тургузарын өөредири турган. Семинарның кол айтырыы бо хүннерде боттуг амыдыралда тодараттынып, чоруттунуп эгелээнин Улуг-Хем кожууннуң культура төвүнүң ажылы бадыткаан.

Ол дээрге Улуг-Хем кожуунга «Сорулга» деп 6-12 харлыг уругларга чаңчылдар лагериниң ажыдыышкыны. Тыва үндезин культура төвүнүң ажылдакчылары ук лагерьниң байырлыг ажыдыышкынынга идепкейлии-биле киржип, ында дыштанып келген чаштарга болгаш оларның ада-иелеринге өгбелерден салгал дамчаан ёзу-чаңчылдарның, хөгжүмнүң, хөөмейниң, тыва оюннарның таныштырылгазын чоруткан. Онзагай чүүл – чаштар «чолукшулга» болгаш «кадак сөңнээр» ёзулалдарга боттары-ла киржип, билиглерин Тыва үндезин культура төвүнүң ажылдакчыларынга бараалгатканнар.

Тыва үндезин культура төвү «Сорулга» лагериниң ажылдакчылары-биле тыва чоннуң үндезин культуразын келир үениң чаштарынга дамчыдар, оларга камгалап арттырар улуг үүлени кады чорудуп турарынга өөрүп, ук лагерьниң ажылдакчыларынга эң-не эки чедиишкиннерни йөрээп тур.

#тыва #тыва_төп #улусчу_ужур_чаңчылдар #Улуг_Хем_кожуун#клуб_народных_традиций #чаңчыл_лагери #Сорулга