Хүндүлүг чонувус!

Шагаа – тыва чоннуң шагдан бээр он ийи чылдың эргилдезин барымдаалап, эрги чылды үдеп, чаа чылды уткуур национал байырлалы. Бо байырлал тыва чоннуң чаагай чаңчылдарын, ёзу-чурумун бодунда сиңирген, ханы уткалыг, ыдыктыг, эрттирерде сагыыр ужурлуг дүрүмнерни бодунда шиңгээткен, сүзүглелдиг байырлал.

Шагаа ыдыктыг байырлал болганда, ону эрттирери тускай ёзу-чурумнуг. Үндезин тыва ёзу-чурум-биле, чаагай чаңчылдар ёзугаар байырлалды чажындан көргүзүп, тайылбырлап бээри – улуг улустуң мурнунда кол сорулга, онаалга.

Салгалдан салгалче  ыдыктыг байырлалывыс Шагааны чыл санында демдеглеп, уткуп турар болганывыста, өгбелеривистиң сагып чораан ужурларын, ук байырлалды эрттирип турган үезинде сагыыр ужурлуг ёзу-чаңчылдарын быжыглап арттырары-биле, эрткен үеден келир үеже сагыызыннныг шынарларын чидирбейн кадагалаары чугула.  Мону чедип алыры-биле, чаш уругларның кижизидилгезинде өг-бүледе ада-иениң соонда база бир эң кол хүлээлгени уруглар садтары болгаш эге школа дагдынган болур. Ынчангаш өг-бүле, кижизидилге, ниитилел, чаагай чаңчылдар, культура ханы харылзаалыг.

Методиктиг дузаламчының кол-ла сорулгазы – «улуглардан уругларже» дээн угланыышкынныг кылдынган. Уруглар садтарында ажылдап чоруур кижизидикчи башкыларга болгаш эге школаның класс башкыларынга таарымчалыг кылдыр кылдынган. Ук методиктиг дузаламчы Шагаа байырлалын эрттирип тургаш, ажыглап болур долу, тодаргай билиглерни тыва эртемденнерниң, авторларның Шагаага хамаарыштыр бижээн чүүлдеринге даянып,  байырлалдың белеткел болгаш эрттирериниң ёзу-чурумун, кылыр ажылдарын, сагыыр чаңчылдарны дээш оон-даа өске ажыктыг чүүлдерни чаңгыс черде  мөөңней чыып бижээн.