Тыва кижи Соңгу, Башкы таңдыларны ажылдыр ай-айы-биле чорук херек кылып аъттаныптарда азы баш муңгаш херекче – дайын-чааже чоруптарда, төрээн чериниң довураан, төрээн хеминиң сай-дажын хойнунга так шыгжап алыр.

“Кижи чери кидирээштиг” дижир, экер эрниң хойнунда төрээн чериниң сай-довураа хары черге ооң амы-тынының камгалакчызы-даа болур, чыл-чылы-биле дайын-чаага чоруп кээрге, чуртун сактып ийлей берген сагыш-сеткилин чазамыктаар хуулгаазын сагыызыны-даа болур деп бурун шагдан дамчып келген тоолчургу чугаа бар.

Кижиниң төрээн чурту, дөс-төөгүзү деп чүве кончуг, олар дег энерелдиг эргим чүве чок, ооң, кижиниң, төк кээп дүшкен чериниң кум-довураа-даа, сай-элезини-даа сүзүглелдиг деп чүве ол.

Алган дөзү: Чүлдүм Ч. Даштар биске хөйнү сөглээр // Башкы. – 1998. – № 5-6. – Ар. 93.