Июнь 2-5 хүннеринде Алтай Республиканың Улаган районунга I дугаар регионнар аразынга национал культура болгаш спорт фестивалы болуп эрткен. Ук фестивалдың спортчу оюннарынга Тываның билдингир мөгелери болгаш адыгжылары киришкеннер.
Тыва Республиканың “Хартыга” мөгези Ооржак Начын-Мерген алтай чоннуң национал хүрежинге (куреш) шүүлген, кожуун чергелиг “Начын” мөге Шыырап Кежик үжүүрлешкен. Спортчу оюннарының иштинде саха чоннуң национал хүрежинге (хапсагай) Ооржак Начын-Мерген ийиги шаңналдыг черге төлептиг болган?
Тыва үндезин культура төвү 2021 чылда Улаган районнуң төлээлери-биле арга-дуржулга солчуп, көшкүн чоннарның национал оюннарын болгаш культура адырын сайзырадыр сорулга-биле кады ажылдажылганың дугуржулгазын кылган турган. Ийи таланың дугуржулгазын боттуг амыдыралга боттандырары-биле Тыва үндезин культура төвү ук тыва чаңчылчаан культураның эдилекчилерин Алтай Республикаже чоргускан турган.
Алтай Республиканың Улаган районунга I дугаар регионнар аразынга национал культура болгаш спорт фестивалынга шылгараан мөгелерге болгаш багжыларга байыр чедирбишаан, моон-даа соңгаар чедиишкиннерни күзедивис!
Шак-ла мындыг регионнар чергелиг хемчеглер кожа-хелбээ чурттап чоруур чоннарның найыралын быжыктырар, уран чүүлүнүң болгаш культуразының сайзыралынга аажок улуг ужур-дузалыг болур дээрзинге бүзүрээр бис.