Улусчу ус-тывыш хүнү-биле!

2022 чылдың июнь 17-де Россия Федерациязының Президентизи В. В. Путинниң Чарлыы ёзугаар июнь айның үш дугаар улуг-хүнүн Улусчу ус-тывыш хүнү кылдыр чарлап доктааткан. Бүгү Россия ук байырлалды бо хүн демдеглеп эрттирип турар. Бо хүнде Кызылдың Н. Гастелло аттыг национал культура болгаш дыштанылга парыгында «Ус-шевер Тыва» деп республика чергелиг фестиваль болуп турар. Фестивалында бүгү республикадан ниитизи-биле 70 ажыг ус-шеверлер киржип, боттарының кылган ажылдарын улус-чонга таныштырып турарлар.

Бурун шагдан бээр бистиң өгбелеривис дарганнарны, чазаныкчыларны, ус-шевер улусту онза хүндүлээр, оларның ажыл-ижин аажок үнелээр чорааннар. Ол чаагай хүндүткел үе-шагның агымынга-даа алыспаан, бо хүннерге чедир бүдүн-бүрүнү-биле дамчып келгени билдингир. Амгы үеде республиканың ус-шеверлериниң ак сеткилдии-биле кылган янзы-бүрү ажылдарын бедик үнелеп, оларның бүдүрген эт-севин чоргаарал-биле эдилеп чоруур улус бистиң аравыста эвээш эвес.

Хүндүлүг ус-шеверлер – улусчу ус-тывыштың камгалакчылары болгаш бүдүрүкчүлери! К. Б. Ондар аттыг Тыва улустуң ёзу-чаңчылдарының, аас чогаал болгаш ус-шеверлер төвүнүң өмүнээзинден силер бүгүдеге Улусчу ус-тывыш хүнү таварыштыр чылыг-чымчак байырны чедирип, чымыштыг ажыл-ижиңерге сайзыралды болгаш чедиишкиннерни сеткиливис ханызындан күзедивис! Кадыкшылыңар быжыг, тура-сорууңар болгаш хей-аъдыңар кезээде бедик болурун йөрээп тур бис!