Июль 1-2-ниң хүннеринде Саха (Якутия) Республикага «Ысыах Олонхо» деп байырлалдың иштинде “Өгбелерниң өнчүзү” деп аъттың дериг херекселиниң Россия чергелиг мөөрейи болуп эрткен. Ук мөөрейге Тыва Республиканың Улустуң ус-шевери Кенин Күдүш-оолович Сат база узаныр уран чүүл делегейиниң шылгараңгай ус-шевери, мерген адыгжы, Тыва үндезин культура төвүнүң ажылдакчызы Артыш Борбак-оолович Монгуш киришкеннер. Мөөрейниң 1-ги шаңналдыг черин Тываның Улустуң ус-шевери Кенин Сат чаалап алган, а ийиги шаңналдыг черинге Артыш Монгуш төлептиг болган.

Сураглыг дарган Кенин Сат биле ус-шевер Артыш Монгуш шилип алган мергежилдеринге бердинип, узаныр уран чүүлдүң сайзыралынга улуг үлүг-хуузун киирип чоруур ховар салым-чаяанныг кижилер болур. Оларның кылган ажылдарын чүгле бистиң чуртувустуң улузу эвес, хөй-ле даштыкы чурттарның төлээлери, аңгы-аңгы язы-сөөктүг кижилер эдилеп, амыдыралында ажыглап чоруурлар. Бо удаа оларга Россия чергелиг мөөрейге төлептии-биле киришкени дээш, байырывыс чедирип, моон-даа соңгаар чедиишкиннерлиг болурун күзедивис!